الجمعة، 26 أكتوبر، 2012

اهداء ..Elsakka قصيدة " الجرافيتى " " إمسح ..... يانظام جبان " مجدى محمود .






قصيدة " الجرافيتى "
" إمسح ..... يانظام جبان "
مجدى محمود .

الجرافيتى
دمعة
على خد الحزين .
لكن تجيبها تانى منين ؟!
الذكرى ،
والثورة ،
والفكرة ،
والدهشة ،
واللمة ،
والمقابلة فى المزلقان ؟!
الجرافيتى بقى انسان
مش مجرد رسمه ،
أو وشمه .....
على الحيطان
"إمسح .....
يانظام جبان "
الجرافيتى فى قلب
مليان برتقان
وشقا البنات
اللابسات
رقة وحنان
الفارشات ع الأرض ....
نهد
والجبان داس ع اللامون
حدِّف بيوت النحل
بالطوب ....
وانتهى
بعد اما مسح الغنوه
من فوق الرصيف !
لملم ربيع ال...
وافترش الخريف !
قتل الجرافتى
عشان م تطلع شمس
ما تبان
الحقيقة على الحيطان
بس الجرافيتى
ورده مزروعة فى وطن
بس الجرافيتى
اقوى م الخوف والزمن
بس الجرافيتى زرعة
مزروعة
بشجن ،
وبهم ،
وبدم ،
وبفن، وبعشق ، وحقيقة !
بتخلق الناس م العدم .
بس النظام !!
إن الكلام ده مش كلام ؟
إيه يعنى ترسم رسمه
ع الحيط والسلام ؟
ايه يعنى حضن ف حضن ؟!
ولا ده حرام
انا قصدى عود، فوق عود ،فوق عود
فتتفرع عيدان
عيدان عيال
شبان
مش بس رسمه على الحيطان وتموت
دى رسمه مخلوقه بايد فنانة
بتحاكى الزمان .؟
- آسف جرافيتى
ابن اللذينه عايز يخطى ؟!
نطع، وغبى ،ومليان عبط...،)
فاكر هاوطّى
انا مش هاوطّى
هارجع أعيد الرسمة
بإرادتى
هرجع
اعيد الرسمة
بالبسمة
على شطى .؟
- الجرافيتى
احنا اتولدنا فى الميدان
وف زحمة ،
وف لمة ،
وف ضمة ،
وف حارة،
وف أمة،
وفى المداخل، والمخارج، والسكوت
هلفوت
يدهن قفا هلفوت
ولا يدهنشى
أحلام
ع البيوت .؟
الجرافيتى
ابن الشوراع ،
والمدارات ،
والمدى .....
حب وفدا حُبه
بنار فى الضِّل
وظل
يقبل انهُ يتمرغ
فى زيت
وف نقشة وف زاويه
وف الحواديت
والفرشه بتسرحله شعره
ياسيدى ماهو انت البيه !!
غجرى ..
ياعينى عليه ؟
ماسكنشى يوم
فى الدفا
حاضن بليلك طل
طالع ...
نهارك فل
كل الخلايق باصه
ع النور بين ايديك
تفتكر هاقبل وتقبل
تسكن الضلمة
ف عنيك .؟!



ليست هناك تعليقات:

إرسال تعليق