دموع من الأول دموع من تانى

دموع من الأول
دموع من تانى

***

بكيت مسحت دموعى
بامسح دموعى بكيت
إملوا علينا البيت
إملوا علينا المخيم
إملوا علينا الظلام
أنا القتيل المتيم
إملوا علينا الشجن
أنا قتيل اتسجن
قتيل فى يوم الفطام
إملوا علينا الهوا
إملوا علينا عينينا
نزفنا دم النور
نزفنا فى حبكم
دم الخيال خلينا
كل البلاد والشهور
بلد وشهر حرام
قليل ما قلنا ياريت
بكيت مسحت دموعى
بامسح دموعى بكيت
إملوا علينا البيت
إملوا علينا الطريق
مبلول كأنه طرى
غنيت لقطر الندى
من كتر ما غنيت
شقت جفون اللى نام
رمت صبية وغلام
إملوا علينا الصرخة
إملوا علينا الكلام
إملوا علينا الفرحة
قليلة يوم الانتقام
قليل ما قلنا ياريت
بكيت مسحت دموعى
بامسح دموعى بكيت
إملوا علينا البيت.

***
فؤاد حداد